Nov 8, 2025
Daga NAMU SANUSI
A duk wata kungiya ta jama’a, manufar neman muƙami ko matsayi ita ce don kawo ci gaba da inganta al’amuran da suka shafi ‘ya’yan kungiyar ta hanyar yin tasiri mai kyau.
Wannan manufa ta fi dacewa da fagen siyasa, inda ake gasa wajen neman mukamai ke da tsananin jama’a, kuma a lokuta da dama ta na haifar da rigima a tsakani al’ummomi. Idan aka yi la’akari da irin gasa da tsananin neman mukaman siyasa a Najeriya, da za a ce waɗanda suka yi nasara — ta kowace hanya — za su nuna irin wancan jajircewa wajen hidimtawa jama’ar da suka zabe su da ba haka ba.
Sai dai abin takaici, ba haka abin yake ba. Masu neman muƙaman siyasa da waɗanda suka samu mukami a ƙarshe sun ɗauki siyasa a matsayin hanyar tara dukiya maimakon hidima ga jama’a. Da zarar sun hau karagar mulki, nan take suke fara wasa da makomar talakawan da suka tsaya a rana da ruwan sama don kaɗa musu kuri’a.
Duk da cewa a kowanne mataki akwai tanadi ga ‘yan majalisar zartarwa, da ‘yan majalisar dokoki, da na wakilai, da sanatoci da su kan su gwamnoni don bunƙasa yankunansu ta fuskar ilimi, zamantakewa da gine-gine, ba a ga wani gagarumin ci gaba ba a rayuwar jama’a da kuma samar musu da kayan more rayuwa. Yawancin masu rike da mukaman siyasa a yau, ba su da wani abin alfahari da za su nuna a yankunansu face manyan gidaje, motoci masu tsada da sauran kayayyakin alatu — abubuwan da ba su da amfani ga jama’ar da suke ikirarin wakilta.
Wannan matsalar tana ci gaba da kasancewa duk da yawancin kuɗaden da ake warewa don ci gaban mazabu da kuma tallatawa a kafafen yaɗa labarai. Amma duk da haka, babu wani abin a zo a gani da ke nuna amfani da waɗannan kuɗade, alhali manufar mukamin siyasa ita ce kawo ci gaba a tsakanin jama’a.
Abin takaici ne cewa yawancin masu mukamin siyasa suna barin mukamansu ba tare da samar da wata ci gaba da za a ci gajiyar ta wajen tunawa da su ba.
Ko da waɗanda suka yi ƙoƙarin aiwatar da ayyuka ga mazabunsu, ayyukan sukan gaza kaiwa matsayin da ake tsammani, ko kuma kuɗin da aka kashe bai nuna ingancin aikin.
Misalan shugabanni masu kishin mazabu
Sai dai a gefe guda, akwai wasu shugabanni ‘yan tsiraru da suka nuna kishin gaske ga mazabunsu. Misali, Honourable Yusuf Adamu Gagdi, ɗan majalisar wakilai mai wakiltar mazabar Pankshin da Kanke da Kanam, ya yi ayyuka da dama da suka shafi kowanne yanki a cikin mazabarsa — kamar bayar da tallafin karatu, gina rijiyoyin burtsatse, gyaran ofisoshin sarakunan gargajiya, gina gadaje da shirye-shiryen tallafawa matasa.
Haka kuma, Honourable Ahmed Idris Maje, ɗan majalisar wakilai mai wakiltar Wase, ya zama abin alfahari ga mazabarsa saboda ayyukan raya ƙasa masu yawa da ya gudanar. Wadannan sun haɗa da hanyoyi da makarantu da gadaje da shirye-shiryen bunƙasa rayuwar matasa da rijiyoyi da samar da wutar lantarki ta hanyar hasken rana da kuma samar da ayyukan yi ga matasa.
Wani abin koyi kuma shi ne Honourable Naanlong Daniel, Kakakin Majalisar Dokokin Jihar Filato kuma ɗan majalisa mai wakiltar mazabar Mikang. Saboda damuwarsa da ci gaban ilimin mutanensa, da kuma fahimtarsa cewa ilimi shi ne gadon da ya fi kowanne daraja, ya gina makarantu da kuma gudanar da ayyukan al’umma daban-daban.
Darussa ga sauran shugabanni da masu jefa kuri’a
Kokarinsa wajen tallafawa matasa da inganta ababen more rayuwa, ciki har da gina rijiyoyi, ya sa makarantu a mazabarsa suka kai matsayin wasu daga cikin mafi kyawun makarantu na gwamnati a yau.
Waɗannan su ne irin shugabannin da Najeriya ke buƙata — waɗanda za su iya cewa su wakilan gaskiya ne na jama’arsu. Dole irin waɗannan shugabanni su zama abin koyi da ƙalubale ga takwarorinsu a dukkan matakan gwamnati.
A karshe, ayyukansu suna sa ana tambayoyi masu muhimmanci: Me sauran ‘yan majalisa ke yi a mazaɓunsu? Me suke so a tuna da su a kai? — gidajensu da motocinsu masu tsada, ko gadon hidima da za a ji daɗin tunawa da shi a cikin al’umma? Wannan tambaya ce da ya kamata ta zama tunani ga shugabanni da masu kaɗa kuri’a baki ɗaya.