Daga GIDEON G. BARDE
Babban dan kasa ne, dan siyasa mara wariyar kabila, dan dimokuradiyya na hakika, mai tausayi, mai son Allah da mutane — marigayi Cif (Dr) Solomon Daushep Lar ya samu lakabin ‘Mai ’yantarwa’ (The Emancipator) ne a lokacin da yake Gwamna na farko da aka zaba ta dimokuradiyya a tsohuwar Jihar Filato daga Oktoba 1979 zuwa Disamba 1983. Wannan lakabi ya ci gaba da zama sunansa na biyu har zuwa rasuwarsa a ranar 9 ga Oktoba, 2013.
Ni a matsayina na tsohon Kwamishina na Bayanai, Harkokin Cikin Gida, Fadakarwa da Bugawa, wanda yake kusa da amintaccen abokinsa, ina jin wajibina ne in rubuta wannan girmamawa domin jama’a su fahimci irin gudunmawar da ya bayar da kuma dalilin da yasa ake kiransa ‘Mai ’yantarwa’.
Haduwarmu ta farko kai tsaye da Cif Solomon Daushep Lar ta kasance a shekarar 1969 lokacin da na shiga jami’ar Ahmadu Bello, Zariya, inda shi ma yake karatun Lauya tun 1966. Mun hadu a karkashin kungiyar Daliban Jihar Benue-Plateau. Ya tsaya daban a cikimmu saboda balagagarsa da kwarewa a matsayin tsohon malamin firamare, kansila, dan majalisar tarayya da kuma karamin minista tsakanin 1957 da Janairu 1966. A lokacin yana shekara ta karshe a Kongo Campus yayin da ni nake fara karatuna a sashen harshen Turanci da Adabi a Samaru.
Cif Lar ya zama lauya a 1971, ni kuma na kammala B.A (Hons) na a Yuni 1972. Shi ya shiga aikin lauya mai zaman kansa, ni kuma na shiga Ma’aikatar Bayanai ta Jihar Benue-Plateau. Mun hadu sau da dama a cikin aikin gwamnati. A Oktoba 1979, lokacin da aka rantsar da shi a matsayin Gwamna na farko da aka zaba ta dimokuradiyya, wanda ya hada da yankin Nasarawa a yau, ya nada ni Kwamishina kuma dan Majalisar Zartarwa ta Jiha mai wakiltar yankin Pankshin, wanda ya hada da Kanke yanzu
Falsafar ’yantarwa da sauye-sauyen siyasa
Falsafar Gwamna Lar ta “’yantarwa” ta fara bayyana ne lokacin taron Majalisar Tsara Dokoki ta Kasa tsakanin 1977 da 1978, inda ya tsaya tsayin daka wajen kare ’yancin kowane dan kasa. Jaridar Nigeria Standard wadda nake shugabanta a wancan lokaci, ta wallafa ra’ayinsa, inda ya jaddada cewa babu wani mutum, kabila ko addini da ya fi wani, domin duk mutane daidai suke a gaban doka da kuma a gaban Allah.
Zabarsa a matsayin Gwamna ya ba shi damar tabbatar da wannan akida ta ’yantarwa. Ya yi amfani da damar da al’umma da jam’iyyarsa ta NPP suka ba shi wajen tabbatar da hadin kai da adalci ga kowa da kowa. A karkashin gwamnatin NPP, an kafa sabbin kananan hukumomi goma sha daya daga cikin 14 da suka wanzu, wanda ya kai su 25 gaba daya.
Haka kuma, gwamnatin ta sake fasalin tsarin gargajiya ta hanyar kafa sabbin sarautu da yankuna, inda adadin sarakunan aji na farko ya karu daga guda daya a 1979 zuwa goma sha daya a 1982. Ya kuma kawo karshen tsarin da wasu sarakuna ke nada ’yan kabilu marasa asali a matsayin shugabanni ga ’yan asalin yankuna. Wannan mataki ya dawo da mutuncin kowane kabila kuma ya inganta dimokuradiyya a matakin tushe.
Haka nan, gwamnatin ta amince da rokon tsohon Sangarin Awe, Alhaji Umaru Usman, wanda aka kori shekaru 25, ta kuma dawo da shi gida. Har ila yau, gwamnatin ta soke harajin “Jangali” wanda ya dade yana takura manoma da makiyaya.
Ci gaban ilimi, tattalin arziki da kiwon lafiya
A bangaren ilimi, Gwamna Lar ya kara yawan makarantun firamare da sakandare da kuma cibiyoyin koyarwa. Yawan daliban firamare ya karu daga 526,039 a 1980 zuwa 600,892 a 1981, yayin da aka kafa sabbin makarantun sakandare 109 cikin shekaru uku kacal. Adadin daliban sakandare ya tashi daga 17,862 a 1979 zuwa 50,000 a 1982.
Don bunkasa ilimin fasaha, Kwalejin Fasaha ta Barkin Ladi ta zama cikakkiyar polytechnic a 1980, sannan aka kafa Kwalejin Ilimi a Gindiri a 1981. Har ila yau, Gwamna Lar ya kirkiro da shirin Ilimin Nomadic ga ’ya’yan makiyaya a Mazat, wanda ya zama na farko a Najeriya.
A bangaren tattalin arziki, an kafa kamfanonin sarrafa abinci, kamfanin inshora na Savannah, da Bankin Lion don samar da kudaden jari ga jama’a. Haka kuma, gwamnatin ta gina Babban Kasuwar Jos da otal mai tauraro biyar ‘Rock Sheraton Hotel’ a Laminga, wanda ya kusa kammala kafin juyin mulkin soja ya katse ci gaban aikin.
A bangaren kiwon lafiya, an fadada asibitoci, an gina sababbi da wuraren kiwon lafiya 50, da cibiyar koyar da kiwon lafiya a Zawan. An kuma mayar da asibitocin addinai kamar Evangel Hospital Jos, Our Lady of Apostles Hospital Akwanga, da Christian Hospital Vom ga kungiyoyin su na asali.
Ayyukan noma, shari’a da harkokin yada labarai
Gwamnati ta kafa Hukumar Bunkasa Noma ta Jihar Filato (PSADC) a 1980, wadda ta habaka gonaki a Bokkos, Sabon Gida, Wase, Wamba da Namu. An sayi taraktoci 650 don tallafa wa manoma, sannan aka samar da makarantar koyon noma a Yelwa. Jihar Filato ta samar da ton 35 na iri shinkafa ga gwamnatin tarayya a 1981 — kashi 26% na bukatar kasa baki daya.
A fannin shari’a, Gwamna Lar ya bude sabbin kotuna a Pankshin, Langtang, Lafia da Keffi, tare da kotunan majistare fiye da goma da kuma fiye da kotunan yankuna 80. Jihar Filato ce ta farko da ta kafa Kotun Koli ta Al’ada don sauraron kara kan al’amuran gargajiya.
A matsayinsa na lauya mai gaskiya, bai nuna bambanci ba wajen nada alkalai daga jihohi daban-daban. A bangaren yada labarai, ya fahimci muhimmancin kafafen watsa labarai wajen gina kasa. Ya kula da ’yan jarida da girmamawa, yana tattaunawa da su a kai a kai. Shi ne ya ba kungiyar NUJ ta Jihar Filato filin da ta ke amfani da shi a Press Centre, Jos.
Lokacin da gwamnatin tarayya ta NPN ta yi masa barazana ta hanyar tozarta gwamnatin sa, sai ya kafa tashar talabijin ta jiha (PTV) a 1982 domin yada sahihin bayani. Haka kuma, an fara wallafa sigar Hausa ta Nigeria Standard mai suna Yancin Dan Adam.
Karshe: Tunawa da jarumi mai adalci
A matsayina na Kwamishina da ya yi aiki kusa da Gwamna Lar, ban taba mantawa da irin amincewar da ya ba ni wajen inganta ma’aikatun yada labarai ba. Shi ne ya bada dama aka kafa PTV da kuma taimakawa wajen biyan ma’aikata duk da karancin kudin shiga. Ya nada ni Shugaban Hukumar PTV, mamba a Kwamitin Afuwar Jiha, da kuma a Hukumar Tenders.
Bayan juyin mulkin soja, lokacin da aka tuhume shi da zargin amfani da naira miliyan 32, ya zabe ni a matsayin shaida ta farko a gaban kotun soja, inda aka tabbatar cewa bai mallaki kadarori ko kudi ba — lamarin da ya tabbatar da tsantsar gaskiyarsa.
Mutuwarsa ta girgiza Najeriya gaba daya domin ya yi rayuwa mai cike da hidima ga dan Adam. Ina farin cikin ganin an shirya masa jana’izar kasa mai girma wadda ya cancanta da ita. Ya kasance mai tausayi da mutunci, wanda kullum ke tuna da abokansa da suka rasu da kuma taimaka musu a lokacin rayuwarsu.
A madadin sauran tsoffin Kwamishinoni da abokai da suka rage da rai — irin su Alhaji Aliyu Akwe Doma, Osana na Keana, Sanata Emmanuel Elayo, da sauransu — muna rokon Allah Madaukaki Ya jikan Gwamna Solomon Lar, “Mai ’yantarwa”, Ya ba shi da sauran abokan aikinsa hutun madawwami. Amin.
Dr Barde ya kasance Kwamishinan Bayanai na tsohuwar Jihar Filato, 1979–1983